Málþing "Félags íslenskra kennara í nýsköpunar- og frumkvöðlamennt" (FÍKNF).
 

Málþingið bar heitið:
 
"Í takt við tímann? Staða nýsköpunar- og frumkvöðlamenntar á Íslandi".

Þar komu saman 39 einstaklingar ,áhugafólk um nýsköpun og frumkvöðlamennt á Íslandi og kynntu hvað þeir hafa verið að gera á fræðasviðinu. Þar voru fulltrúar af öllum skólastigum allt frá leikskóla til háskóla og kynntu sitt og tóku þátt í umræðum um þá framtíðarsýn sem þeir hafa í eigin starfi og fyrir fræðasviði í heild.
 
Á málþinginu fór félagið yfir stöðuna á sviði nýsköpunar- og frumkvöðlamennta á öllum skólastigum og ræddi framtíðarhorfur menntunar á þessum sviðum. Í ljósi endurskoðunar á námskrám og skipulagi skólakerfisins svo sem fyrirhugaðrar styttingar framhaldskólanna samþykkti málþingið eftirfarandi ályktun einróma til menntamálaráðherra og helstu fjölmiðla:


Ályktun málþingins

Nýsköpunar og frumkvöðlamennt er menntasvið þar sem nemendur fá tækifæri til að hagnýta þekkingu sína á skapandi hátt og ýtir undir frumkvæði þeirra og framtakssemi. Málþingið skorar á menntamálayfirvöld á Íslandi að móta skýrari framtíðarsýn fyrir málaflokkinn, sem felur í sér samfellu og vaxtarmöguleika gegnum allt skólakerfið.

Markmið málþingsins var að draga fram í dagsljósið þau verkefni sem verið er að vinna í skólum. Athygli vakti hversu útbreiddur áhugi var á þróunarvinnu á sviðinu og á menntunarfræðilegum rannsóknum tengdum nýsköpun og frumkvöðlamennt. Einng kom berlega í ljós sú gríðarlega þróunarvinna sem hefur verið lögð í kennsluefni og námsskrá á framhaldsskóla stigi og háskólastigi sem svaraði vel þeirri vinnu sem unnin hefur verið á síðust 15 árum á grunnskóla- og nú leikskólastigi. 

Kom fram að nú þegar er að myndast samfella milli skólastiga þar sem leikskólarnir taka almennt á skapandi starfi og skilningi á vinnuheimi fullorðinna. Síðan tekur grunnskólinn við með áherslur á nýsköpunarstarf og hagnýtingu þekkingar í þágu hugmyndavinnu sem heldur áfram á unglingastigi út í kynningu á atvinnulífinu og frumkvöðlafræði. Í efstu bekkju grunnskóla og í framhaldskólunum hefur verið góð reynsla af því að vinna með fyrirtækjum á borð við Junior Acheivement og Frumkvöðlafræðslunni og fleirum þar sem tekið er á frumkvöðlafræði og viðskiptaframtaki. Í tillögum að nýrri námsskrá framhaldsskólanna er nú einnig búið að skilgreina áfanga innan viðskiptagreinanna sem tekur á nýsköpun og frumkvöðlafræði á viðameiri hátt og brúar sá áfangi vel bilið upp á háskólastig.  Á háskólastiginu hefur þróunin á síðustu árum verið sú að skólarnir hafa komið sér upp kennarastöðum, prófessorum eða dósentum í nýsköpun og frumkvöðlafræði.  HÍ, HR og Bifröst hafa farið þar fremstir í flokki en KHÍ og HA hafa aðallega tekið á þessu í gegnum kennslufræðina hjá sér. 

Eins og fram kom á málþinginu er komin góð reynsla víða í skólakerfinu á nýsköpunar- og frumkvöðlamenntakennslu. Slíkt menntaframboð er enn ómarkvisst og fer mikið eftir einstökum skólum og kennurum hvort því er sinnt.  Nauðsynlegt er að hafa skýra sameiginlega sýn í málaflokknum sem nær yfir allt skólakerfið, ekki síst hvað varðar námsskrár og stoðkerfi kennara. Benda má á að nágrannar okkar danir og norðmenn eru að formfesta og leggja aukna áherslu á nýsköpunar- og frumkvöðlamennt gegnum allt menntakerfið. 


Dagskrá:

13:00 Setning
Svanborg R Jónsdóttir formaður Félags íslenskra kennara í nýsköpunar- og frumkvöðlamennt. 

13:10 Skapandi starf á leikskólastigi

13:20 Nýsköpunarmennt á grunnskólastigi
- Svanborg R Jónsdóttir: Staða nýsköpunarmenntar á grunnskólastigi.
- Lóa Kr Guðmundsdóttir nýsköpunarkennari í Foldaskóla og nemendur segja frá nýsköpunarmennt í Foldaskóla.
- Harpa Magnúsdóttir nýsköpunarkennari í Njarðvíkurskóla segir frá reynslu sinni af nýsköpunarkennslu.
- Guðrún Þórsdóttir skólastjóri Vinnuskóla Reykjavíkur : Nýsköpun í náttúrunni
 
13:50 Framhaldsskólastig
Kynnir: Steingerður Hildimundardóttir Flensborgarskóla
Gunnar Jónatansson segir frá starfsemi Junior Ahcievement á Íslandi
Björn Gíslason verkefnisstjóri í Impru nýsköpunarmiðstöð segir frá verkefninu Ungir frumkvöðlar. 

14:20-14:40 Kaffihlé 

14.40 Nýsköpunar- og frumkvöðlamennt á háskólastigi
Örn Daníel Jónsson prófessor í viðskipta og hagfræðideild Háskóla Íslands. 

15:30 Umræður

Málþinginu verður slitið kl 16:00